الحلقة الرابعة :
وبعد مده كده .. وانحنا كل يوم في زيارة لي عصفور .. كلها ونسة وضحك .. نتذكر ايام شقاوتنا زمان .. عرفنا انو التليف ما كتير وتم استئصال الجزء المتليف من كبدو .. وخرجوهو علي البيت .. وديناهو بيت مريومة عشان يرتاح ويلقي ليهو زول يعتني بيهو .. وانا كل يوم يومين كده حسب ظروف الشغل .. بمشي عليهم نهاية اليوم اتونس معاهم واشوف احوال عصفور شنو وامشي علي البيت .. وفي يوم وانحنا اخر ونسة وانبساط قولت ليهم :
- تتذكروا حبوبتي خدوج .. وحكاويها .. وقصصها بتاعت كل يوم بالليل ديك .. ناس فاطنة السمحة ولولي يالولي والغول والكلام ده ..
- كيف يا عمر ياخ .. دي ايام تتنسي برضو .. مع انو الزمن طال لكن والله بتذكرها زي التقول ليها يوم ولي يومين .. خصوصا حبوبتك خديجة دي ياخ .. كانت زولة غريبة بي شكل .. تنفع تكون ممثلة والله .. كنت بستمتع جدا بي حكاويها وطريقة كلامها
- هوي يا مريومة انتي كنتي بتنومي قبال ما القصة تبدا ولا شنو يا عمر
- ايييييييييك تقعد تنكرش ليك .. وتعذب ليك حبوبة .. كل شوية والتانية .. انا جعانة يا حبوية بي صوت عالي شديد .. وانحنا نضحك فيها وفي عيونها المفتوحة نص كم دي .. كانت ايام والله
- هوي يا شمتانين انتو .. انا كنت قدر شنو لكن .. انتو مشاء الله عجايز عديل كده .. بالجد تعبت معاي جنس تعب .. مرة تعجن لي كسرة بي ملح وشطة حمرة وشمار وحبة زيت .. يا الله .. ومرات تسلق لي بامبي وتعجنو لي بالدكوة والشطة الحمرة .. ولا ما كده يا عصفور .. تتذكر اسم عصفور ده لقيتو كيفن
- والله يامريومة لو قلت ليك بتذكر الحكاية بالظبط اكون غشيتك .. لكن بتذكر انو القصة كانت عن فاطمة السمحة واخوها محمد .. وهم في الغابة محمد عمل ليهو شرك قبض بيهو حديّة ولا طيرة تانية ما عارف .. الحدية قعدت تكورك يا لولي يالولي ابوك في الشرك يا لولي فكي الغنم والدهب يالولي .. محمد شال الغنم والدهب وبقي اكبر تاجر في البلد .. ولا حاجة بالشكل ده .. وانا كنت بغالط حبوبة واقول ليها الحديّة ما بتتكلم يا حبوبة يكون ده عصفور .. مش كده
- ضحكنا كلنا بي صوت واااحد .. وقلت ليهم كانت ايام جميلة بالجد والله .. نفتقدها بي شدة اليومين دي .. مين كان بصدق نجي نتلاقى تاني مع بعض في قعدة واحدة زي دي .. ربنا يرحمك يا حبوبة خدوج .. ويجعل الجنة مثواك الاخير يارب .. والله يا عصفور لحدي ما ماتت بتسالني عنك وعن اخبارك .. تقول لي الولد المفعوص عصفور المجرم ده وين .. اقول ليها شديد يا حبوبة بسلم عليك كتير .. تضحك وتقول لي انت لسع بتغطي ليهو وتكضب عشانو
- ربنا يرحمها والله .. كانت بتعاملني زي امي واكتر والله .. مع اني كنت معذبها عذاب الله اكبر .. كل يوم بسرق نضارتها وادسها منها .. ولو ما ادتني قروش ما برجعها ليها .. اييييييييييه ايام ..
- والله يا عصفور عمر ده تعبتوا معاك جنس تعب .. كل يوم ياخد جلدة قصادك .. لانو بكضب ويقول ما عارفك مشيت وين .. وبالطريقة دي كل يومين تلاتة ماخد ليهو علقة نضيفة
- والله يا عمر بالجد انت كنت بتستحمل الضرب ده كيف ياخ .. بالجد كنت بنبسط منك خالص .. ولي هسع ما مقصر معاي ياخ
- اها الموضوع داير يقلب عواطف وانفعال وكلام من ده مش .. انا اسيبكم بي عافية كده .. واجيكم يوم تااني الزمن إتأخر وكده ياخ
- اها لسع بتخاف تمرق برااك اجي اقدمك ولا كبرت واتشجعت .. اصلك كنت جبان خلاص
- اهاااا الموضوع جاب ليهو طعين وكلام من ده مش .. لالا ياخوي خليك راقد .. انت بقيت خردة بس .. احسن انا الخواف .. يلا فتكم بي عافية
الحلقة الخامسة :
وفي يوم وانا شغال في الورشة بتاعتي بي مزاااج كده .. جاتني مريومة بي صينية الفطور .. وهي مبسوطة كده .. عرفت ليك من تعابير وشها انو عصفور حرق تمام التمام وما عندو عوجة بعد كده ..
- هاك افطر يا وسخان .. هسع ما لقيت شغل الا بتاع الوسخ ده .. ان شاء الله كنت تبقي دكتور سااي
- ضحكت وقولت ليها انا البطلعوا من ورشتي دي الدكاترة ما بطلعوهو .. وبعدين انتي عارفة لو ما ظروفي كنت واصلت علم وهسع كنت اكون اكبر موظف في البلد دي .. الكلام فيك انتي .. يومك كلو غسيل كده .. وصواطة عصيدة وملاحات ..
- والله يا عمر لو ما وفاة المرحوم .. ما كنت اشتغلت .. لكن انت عارف براك ظروف المدارس ومصاريف الاول ياخ
- طيب قبيل شن قلنا يا انتي .. بس انتي دايما بتحبي التعب .. هسع لو وافقتي كنتي ح تعيشي اميرة عديل كده .. واولادك ح يبقوا اولادي .. زيتنا في بيتنا وكده .
- هوي يا خمجان الكلام ده ح نعيدو كم مرة .. انا مش قلت ليك انت زي عصفور اخوي .. وزيادة كمان .. تاني سيرة الكلام الشين ده لزومو شنو ؟؟!!
- والله يا انتي انا من قبل المرحوم كنت دايرك وانتي عارفة كده .. وكلمتك لكن انتي قولتي لي كلامك المسيخ ده وسديتي نفسنا من العرس زااتو
- هوي الغبيان كلمتك مية مرة .. واخترت ليك كم عروس .. انت براااك متسبل ساااي .. عامل لي الود حبيب .. وتاني ما بتعرس
- والله يا انتي انا العرس ده طار لي من راسي خلاص .. لكن حبيت اهظر معاك ساااي
- باللاهي .. كل ما يعصروك تقول الكلام ده .. كدي هسع خلينا من الكلام ده .. انا جيت احكي ليك موضوع كده بخص عصفور
- خير ان شاء الله .. داير يرجع تاااني برضو ولا شنو !!
المزيد
ـــــــــــــــــــــــــــــــــــــــــــــــــــــــــ
